Mar 2 | WEDTOPURA | STEP | Yesu ana tauvotaghotagho maitehi hi wanavira-meyehi au Kapernaum. Ma au pom ruwagha au murina, tuyeghana hi nonori da Yesu i nememei au meyagai.

Mark 2

Yesu oroto gwaghagwaghana ivi yawahani

(Mat 9:1-8; Luk 5:17-26)

1 Yesu ana tauvotaghotagho maitehi hi wanavira-meyehi au Kapernaum. Ma au pom ruwagha au murina, tuyeghana hi nonori da Yesu i nememei au meyagai. 2 Yamna aubaina rava maghamaghauhi hivi tagogiyehi au numana. Patara hi magha guratana da numa metaetana maiteni i howai. Yesu, God riwana i rarauguguyei. 3 Rava 4, vatavatarei oroto gwaghagwaghana hi avarai da hi neiyai Yesu awarina. 4 Rava hi magha guratana da egha tagotagogina hita ne'i Yesu awarina. Yamna aubaina teteyei hi amghaena da numa au pohewana gavogavo hi bauni. Gwaghagwaghana vatavatarana hivo vai-hariharirini Yesu au naona. 5 Yesu, ravahi i inanahi da hivi tumaghanei. Yamna aubaina da orotona gwaghagwaghana i riwei ipa, “Natu'u, am ghoha'apoapoe a nota-tawane'i.”

6 Mai Jew ahi Raugagayo Tauviharaharamananahi ghehauhi kampa hi tughutughura ma ahi aunota wenana'arena hivivi nuwa-notanota, 7 “God, Tau avana ghoha'apoapoei e notanota-tawane'i. Aiwa'i aubaina da tauna we ravana nana'arena e dedede? Tauna, God e teretere-gha'irei; ma tauna e teretereghe'etana-meyei da tauna me God nana'arena.”

8 Maratagogi, Yesu aruwanei i haramanei da tauhi nana'arena hivivi nuwa notanota, aubaina i riwehi ipa, “Aiwa'i aubaina we'i riwana ovivi nuwa-notenotei? 9 Metauna kauwana i teatea: da gwaghagwaghana ata riwei, ‘Am ghoha'apoapoe a nota-tawane'i.’ Bo, ‘Ma vomahiri, am anieno ma vaini ma ma nae?’ 10 We'i kauwana a kaukauwei da taumi ona haramane'i da Rava Natuna ^{▼▼2:10Dan 7:13-15} ana riwapana au dobu e ma'ama'ae da ghoha'apoapoe ina nota-tawanehi.” Ma gwaghagwaghana i riwei ipa, 11 “A riwem; ma vomahiri; am anieno ma vaini ma ma nae am au numa!”

12 Oroto ivo mahiri ma ana anieno i vaini ma maratagogi i nae. Patara hi inanai ma hi bahana guratei. Tauhi hi hauhepahi ma God hivo hepahepai ma hi ririwa, “Tau'ai egha meyanai kauwa wenana'arena ata inanai!”

Yesu, Levi i ghorei

(Mat 9:9-13; Luk 5:27-32)

13 Yesu ana tauvotaghotagho maitehi Kapernaum hi hopu-tawane'i ma Galili topana au gerahana hi naenae. Ma patara hi ne'i, awarina ma tauna God riwana ahi'ahina ivi haraharamanihi. 14 Ma i verau-nae ma oroto wavana Levi Alphaeus natuna, ana bagibagi au gabuna i tughutughura ma mane i tamitami Rome gabemanina aubaina. Yesu i riwei, “Ma votaghotaghoiu!” Levi ivo mahiri ma ivi muri-taghotaghoi.

15 Yesu ana tauvotaghotagho, mane tautamina ghehauhi, ma ghoha'apoapoe ravahi; tauhi, Yesu maitehi hivo taghotaghoi. Anatapuhi, Levi ana au numa hi am'am gogona. ^{▼▼2:15Pharisee, mane tautamihi ma rava ghehauhi hi ghoreghorei, ghoa'apoa'apoe ravahi, aubaina tauhi eteni ravahi maitehi hivo vobagibagi tagogi ma Moses ana raugagayo hi rau-raugahi.} 16 Pharisee ma tauhi tagogihi Raugagayo Tauviharaharamanahi; tauhi hi inanai da Yesu mane tautamina ma ghoha'apoapoe ravahi maitehi hi am'am. Anina ma tauhi, Yesu ana tauvotaghotagho i riwei, ipa, “Aiwa'i aubaina Yesu, mane tautamahi ma ghoha'apoapoe ravahi maitehi he am'am?”

17 Ma maranai Yesu we'i dedena nana'arena i nononori; tauna, tauhi i riwehi, “Rava yawayawahanihi, tauvi yawahana egha hita ghoheghohehi. Ma rava doridoriahi; tauhi, tauvi yawahana he ghoheghohehi. Ta'u egha ata ne'i rava ahiahihi aubaihi. E'egha da rava deghadeghahi aubaihi a ne'i.”

Hudi raubayadana

(Mat 9:14-17; Luk 5:33-39)

18 Maratagogi, John Taubabataito ana tauvotaghotagho ma Pharisee hi hudihudi. Ma rava ghehauhi, Yesu awarina hi ne'i ma hi rau-bayadei hipa, “Aiwa'i aubaina John Taubabataito ana tauvotaghotagho ma Pharisee maitehi he hudihudi ma tam am tauvotaghotagho e'egha?”

19 Yesu i pari-beyehi ipa, “Taumi o notanotai da tauhi tauviyaraga, tavine ana au am egha hina am bo? E'egha! Maranai tavitavine vou-orotona, tauhi maitehi he ma'ama'ae, tauhi hita hudi ava. 20 Ma mara ina ne'i da tavitavine vou-orotona, ana ghavia hina vaina-tawanei ma na'i maranaina ana rava hina hudi.”

21 Ma i riwa ipa, “Ta'u kauwa vouna a neiya'i, egha me taumi ami kauwa wadubona nana'arena. Egha aiya'i ravana, gara wadubona ma wanawana-sikana, gara vounei ina hirahirama pota'i. Anona yamna rauogha awarina garana vouna, wadubona ina roro'i da gavogavona ina ra'ata. 22 Ma nana'arena egha aia'i, wine vouna ina vaini da wage wadubona awarina ina hiwaghi. Mepa da ina ghohai; yamna na wine wagena ina wana-vaipawai ma wage ina wana-hedari da wine ma wage ina apoapoe.”

Yesu, Sabate i parivai-eta'eta'i

(Mat 12:1-8; Luk 6:1-5)

23 Maratagogi au Sabate, witi debagauna au horana, Yesu ana tauvotaghotagho maitehi hi naenae. Ma ana tauvotaghotagho, witi hi vaini da hi am'am. 24 Pharisee ghehauhi, we kauwana hi kaukauweiya hi inanai. Yamna aubaina da Yesu hi riwei, “U haramanei da ataRaugagayo i riwa da Sabate, yamna viyawahi marana. Aiwa'i aubaina da tauhi hevovo bagibagi?”

25 Yesu i pari-beyehi ipa, “David ana tauvotaghotagho maitehi am hi hiraghe. Ma aiwa'i hi ghohai? ^{▼▼2:251 Sam 21:1-6} Taumi o hiyavi ma aiwa'i aubaina anona egha otavi nuwa-notenotei? 26 Pirisi Gheghe Vavahaghana, Abiata ana au mara; David, God ana au numa i rui ma payawa ivi baghei. Pirisi Abiata, payawa ghehauhi i verei; payawana yamna God awarina am'amverenana ma i verehi. Raugagayo e ririwa da piripirisi tauhi ava, nai payawana he aniani. David ana tauvotaghotagho maitehi, payawana hi ani ma God egha ita riwa da yamna kauwa apoapoena.”

27 Ma Yesu ana riwa au damona i riwa ipa, “God, Sabate i ghohai rava vohaguna aubaina ma egha rava ita ghohai Sabate vohaguna aubaina. 28 Ta'uRava Natuna. Yamna aubaina ta'u aninaSabate badana.”